قصة من زمن الصيد الجميل

بقلم أ/ ايمن الديدامونى 

                                                                                 

الزمان ........ موسم 2009المكان ..... ترعة السلام

 - سهل الطينة لم يكن هناك ما يعكر صفو رحلتنا فى ذلك اليوم ، فكل شىء على ما يرام والحمد لله ... السيارة جاهزة والطعم جاهز والصحبة ولا أحلى من كده .وصلنا إلى معدية القنطرة حوالى الساعة الثالثة بعد منتصف الليل وكان الطريق مزدحم جداً لذا تأخرنا ، ركبنا المعدية وعبرنا الى الجهة الشرقية من القنال ، وصلنا إلى كافيتيريا ومطعم الننوس ( حاجة كده بلدى بس بيعمل شوية عدس عجب ) ، تناولنا العدس أنا وأخى إيهاب وأشرف صديقى وكان العدس هو السبب الذى جعلنا نركب المعدية فى هذه المرة وبعد أن إنتهينا إنتظرنا صلاة الفجر وصلينا فى المسجد المجاور للكافيتريا ، ثم إنطلقنا الى ترعة الذهب ، وصلنا على المية حوالى الساعة 5.30 صباحاً وإتفقنا أن نجلس على أحد التفريعات الجميلة ونحن نسميها ( ترعة البط ) لأنها مجاورة لبعض منازل أهل القرية وكان البط دائماً يأتى وينزل الترعة فيخاف السمك ويهرب من الدور ، المهم جلسنا فترة الصباح نشتغل بالجمبرى البرغوت ، وتم شراء الجمبرى من صديق لنا كان يسافر العصر بورسعيد ويشترى كمية من الجمبرى ويبيعها للصيادين على الكافيتريا .بدأ السمك يأكل معانا على الجمبرى وكنا بنأخد سمك كفافى كويس وأحياناً أصغر وأحياناً كان ممكن تقع معاك غلطة ربع كيلو ، إستمر هذا الحال حتى الساعة العاشرة صباحاً والواحد فينا بيكون ربنا كرمة بحوال 2 أو 3 كيلو .عند العاشرة قلت للشباب أنا رايح على الترعة الكبير ( ترعة السلام الرئيسية ) ومش حأتحرك من هناك لغاية لما نروح بإذن الله ، فقالوا يلا بينا ، وصلنا على الدور المحترم الذى إخترتة من مرة سابقة وكان بجوار ميزانية فتح بتدخل المية لتفريعة عرضها حوالى 20 متر ، المهم فردت عودين للريم وطعمتهم وبسم الله ورميت فى المية على مسافة حوالى 20 متر من الشط وطول الوش بيكون متر على الاقل .طبعاً عايز أقولكم حاجة مهمة جداً ودى هى أهم حاجة فى موضوع النهاردة ، كان موجود على مسافة 20 متر من الشط وبإتجاه مدخل المياة للتفريعة الجانبية ، كان موجود حاجة زى السور أو أكوام من الحجارة موجودة فى هذه النقطة وكانت المية مغطية هذه الحجارة بحوالى 20 سنتيمتر ، ودة يمكن علشان تكون عائق لتهدئة سرعة المياة عند الدخول للتفريعة ( للأسف تم إزالتها من قبل المسطحات بعد ذلك ) فكانت المنطقة دى وكأنها الكافيتريا الخاصة بالبلطى من الأحجام الجامبو ، بس مشكلتها أنك لازم تكون عارف حترمى فين لأن لو رميت غلط الوش بيوعر وبيقطع فى الحجارة ، بعد حوالى ربع ساعة بدأت تضرب على الريم وبدأت أخد سمك ربع ونص كيلو حوالى 7 سمكات بلطى وكذلك أيهاب أخويا وأشرف صاحبى ، وبعد حوالى ساعة ونص لقيت السمك معوم فوق الحجارة دى وبيأكل فى ديل الفرس اللى حواليها ، طيب أعمل إيه علشان يدخل على الريمة ، غيرت الوش تماماً وركبت وش تانى قصير طوله 15 سنتيمتر وغيرت الرصاصة وركبت غماز غلة صغير جداً جداً رمش العين لا يكاد يكون له وزن وبدأت أرمى جنب الحجارة وبعدين أسحب لغاية لما يجى الوش على الحجارة والحمد لله مكنش فيه هواء أو رياح لذلك كنت أتمكن من رمى الخيط لمسافة كويسة وكان لازم أخفف من حجم الريم اللى بطعمة فى السن علشام لما الريمة بتأخد مية بتكون تقيلة وتغطس لتحت ، المهم جربت أول مرة ومفيش ثوانى لاقيت الخيط بيشد وبيأخد على تحت الحجارة ، ضربت عليه وماشاء الله حاجة تقيلة ومحترمة ، وبدأت الم الخيط بحذر حتى لا يشبك السن الحر فى الحجارة ، والحمد لله وصلت السمكة بسلام إلى الأيس بوكس وزن حوالى 2.5 كيلو .رميت المرة التانية بنفس الطريقة ومباشرة أخدت السن ونزلت لتحت الحجارة ولما رديت وضربت على الخيط كان السن الثانى الحر شابك فى الحجارة وهنا كان لازم الواحد يتصرف بحكمة ، فضلت ثابت بإيدى على الخيط والخيط مش مشدود قوى يعنى يكون مريح حاجة بسيطة علشان تعطى السمكة فرصة أنها تأكل الطعم فى السن اللى شبك فى الحجارة وتسلكة ، وقد كان وبعد حوالى نصف دقيقة لاقيت الخيط بيشد والسمك واخد الخيط على جوه المية مش تحت الحجارة بس كانت حاجة تقيلة فعلاً ، فى الحالة دى إيهاب وأشرف قالولى دى حتة كبير جداً وأنا قولت لهم لالالا دى سمكتين لأن السمكة التانية هى اللى بلعت الطعم وسلكت السن من الحجارة .ظل التعامل مع السمكتين لمدة 8 دقائق بالضبط بكل دقة وحرص وحرفته لغاية لما وصلوا على الجسر وكأنك بتشد قماشة من المية وبدون اى مقاومة قام إيهاب أخويا برفعهم على الملقاف مع بعض وكانت واحدة منهم وزنها حوالى 3 كيلو والتانية كانت حوالى 2.5 كيلو ................ وبعدها ،،، حلفت ألف يمين ما عادت تأكل مرة تانية ، وكان من أحلى الايام وأمتعها .

الدروس المستفادة* كيفية التأقلم مع الدور وتطويع معداتك لخدمة الدور
* عدم التسرع فى إخراج السمكة طالما هناك ما يهددها بالضياع
* لابد أن تتخيل طريقة معيشة السمكة وتحركاتها فى الدور

ودى صورة السمك فى اليوم ده
بلطى بالدم

صيد قشر البياض من ترعه السلام

أسعد الله مسائكم جميعاًوجعل الله جميع أيامكم صيد وأفراحويرزق الجميع من فضله

حبيت أنى أقولكم عن تجربتى الشخصية فى صيد سمكة رائعة
يبحث عنها جميع الصيادين ويتفاخرون بصيدها وأحمد الله أننى كنت
واحداً ممن كتب لهم الله إصطيادها مرات عديدة
بس بصراحة الكلام ده منذ حوالى 3 سنوات ولم أكن وقتها أهتم بتصوير
السمك ....
وإليكم تجربتى الشخصية منذ بداية رحلة الصيد حتى العودة ، وأحب أن أنوة أنه ليس شرطاً أن تكون طريقتى هى المُثلى أو الصحيحة ولكن المهم فى النتائج .

أولاً : أنا من سكان مدينة أبوكبير محافظة الشرقية ومكان الصيد هو ترعة السلام التابعة للقنطرة شرق - سهل الطينة ، محطة الرفع 4 أو كوبرى 10 ... التحرك بسيارتى من أبوكبير بعد صلاة العصر مباشرة وبصحبتى أخى الأصغر وإثنين من أعز أصدقائى وهؤلاء هم رفقائى دائماً ونادراً ما أخرج للصيد بدونهم .

ثانياً : متطلبات الرحلة : طعام يكفى ليوم وليلة ومياة تكفى للشرب لبعد مصدر مياة الشرب عن المنطقة وأيس بوكس كبير حوالى 50 ليتر لحفظ الثلج به ، أيس بوكس لإستخدامك الشخصى فى الصيد ، عدد كافى ومتنوع من الأعواد والمكائن والسنار والخيوط والرصاص وجرس للعود وفسفور لو تحب ، طعم متنوع سأشرحة فيما بعد .

ثالثاً : نصل إلى المياة قبيل المغرب عند محطة الرفع 4 ، أبدأ بفرد عود 360 سم رقع لصيد البلطى الشِر من التفاريع العديدة التى هناك ، وبحضر عياشة وأضع فيها الشِر اللى يكون صحتة كويسة لأن القشر مبيدخل غير على السمكة الحية ، خلال ساعة تقريباً أكون إصطدت حوالى 10 أو 12 سمكة بلطى شر ، بعدها أصلى المغرب وأبدأ فى الدخول لصيد القشر .

رابعاً : أحضر عود القشر وهو عبارة عن عود (شكسبير _ دايوا ) 240 سم صب قطعتين وعلية ماكينة شيمانوا أو بانكس 7000 ، المهم لازم تكون مكينة قوية والخيط على المكنة مقاس 70 أو 80 مم وأنا بستعمل Big Game أحمر .... وخيط الترميل عبارة عن خيط حرير prow power مقاس 20 ليبرة يعنى يشيل لغاية 35 كيلو تقريباً ، والسنار بيكون مقاس 2 أو 3 عسلى محمل ، وبتربط الوش الحرير مع خيط المكنة وبينهم مدور كبير بدون قفل ، وأنا عن نفسى بركب الرصاصة تحت الوش بحوالى 25 سم وبدون غماز .... وبركب جرس على لبلوب العود ... وأخد سمكة من العياشة تكون صحتها حلوة وأشبكها فى السن من خلف الرأس من ناحية الزعنفة الظهرية بدون أن تلمس العصب ( الشوك ) .   

خامساً : أنا بقف فى منتصف الكوبرى وأقول بسم الله الرزاق وترمى فى المية ، وأركن العود على الكوبرى وأشغل العود الثانى عبارة عن فيبر 3 متر ، الأمين ... وعليه ماكينة ميتشل 5000 والخيط عليها 60 مم والوش 45 مم وغماز وسط مع رصاصة للوزن والسن بيكون 3 أو 4 والطعم عبارة عن دود بلدى ( علق ) واحد صاحبى بيجيبهولى من الجنينة بتاعتهم من تحت طلمبة المية ، طعم أسود تخين بس محترم وبطعم السن عنكبوت حوالى 3 طعمات وأرمى ناحية الشط شوية .

سادساً : أهم حاجة تكون عصفورة المكنة مفتوحة لأن القشر مجرم وحساس جداً ولو شعر بالخيط حيهرب ، وبعدين لما بترمى الخيط بتحدد طول الوش والقشر لما بيشوف السمكة بتجرى بيهجم عليا زى المجنون وأهم حاجة لما تلاقى الجرس بيرن على اللبلوب تصبر ثوانى لغاية لما القشر يبلغ وبعدها يا معلم تقفل عصفورة المكنة وتكون ظابط الدراج بتاع المكنة على 18 أو 20 وتضرب على السمكة بحرفنة يعنى ترد الخيط بحيث السن يرشق صح ، وتبدأ تلعب مع السمك وتشرق فيه لغاية لما يتعب ولو حسيت أنه بيشد معاك إفتح الدراج بتاع المكنة شوية وأهم حاجة يفضل الخيط بينك وبين السمكة مشدود وميكونش فيه بوش .

سابعاً : ربنا يكرمك وتيجى القشرة أو ( حمار البحر ) زى ما بيسموه فى المنطقة ، يجى على الشط وحسب الوزن ، لو كان وزنة كبير مثلاً فوق 2 كيلو يبقى لازم يساعدك حد بالملقاف ويرفعة من المية ، أما لو كان وزنة أقل فممكن تشيل على الخيط ..... وأهم نصيحة فى هذا الجزء أنك متستعجلش ومتخفش لأنه لو بلع معاك صح وعدتك كويسة .... يبقى السمك بتاعك إن شاء الله .

ثامناً : الأوقات التى يدخل فيها القشر ، بعد صلاة المغرب مباشرة أى بعد غروب الشمس ودخول الظلام ، وعند منتصف الليل وحتى شروق الشمس ، وفى أحيان بيدخل فى النهار وقت الظهيرة ، ولازم تأخد بالك لأن المية بتاعت ترعة السلام فيها أحجام كبيرة ممكن توصل لغاية 30 كيلو وأكثر .......... أنا عن نفسى أكبر حاجة طلعتها من هناك 12 كيلو .

تاسعاً : ممكن يدخل على الدود ( العلق ) بلطى تقيل أو قرموط أو بنى أو مبروكة ، ومع شروق الشمس ممكن تريح ساعة نوم فى العربية علشان تقدر تواصل ومع شروق الشمس أبدأ أنزل بالريم على البلطى فى التفاريع وحتى وقت الظهر .... أرجع على ترعة السلام الرئيسية وأنزل عود بالطعم حداف والتانى ريم .

عاشراً : بعد العصر ......... نستعد للرحيل والعودة إلى الديار محملين بالغنيمة وفى منتهى التعب ونقول لبعضنا الواحد لازم يريح الأسبوع القادم ونيجى نصطاد الأسبوع اللى بعدة ............ ويمر يوم أو يومين وتبدأ التليفونات تشتغل لتحديد أقرب موعد للرحلة التالية .......... الصيد فى ترعة السلام حكاية عشق لا تنتهى .

يارب أكون قد أوفيت فى الشرح وزى ما قولت دى تجربة شخصية بحتة ، وممكن يكون فيها حاجات كتير غلط ولكن المهم النتائج ........... وتصبحوا على ألف خير .

أخوكم
أيمن الديدامونى - المحامى

https://www.facebook.com/groups/SYADELNEEL/