الصيد بالغله

بسم الله الرحمن الرحيم

وبه نستعين

الصيد بالغله

هناك ثلاثة انواع من الغله امريكانى وروسى والاخر بلدى فى تلك الحالات الثلاثة شغالين

طريقة التحضير

تنقع الغله لفترة اربع ايام او على حسب اذا كانت امريكانى او روسى او بلدى فهى من ثلاث ايام او اربع او اكثر

او تسلق فى الماء على النار لمدة 12 دقيقة او اكثر بقليل على حسب نضجها 

اولا تجهيز العلفه

التكوين

علف بادى + ردة خشنه + رغيفين خبز مفروكين + 120 جرام غله منقوعة او مسلوقه + دشيشة ناعمة + زبل فراخ

تخلط المكونات جيدا ويستحسن قبل الطالعه بيومين وتترك لتخمر فى الشمس

انت الان على راس الدور

عمل مرايا

كيفية عمل المرايا

المرايا هى اهم مافى الشغل كله

بعد القاء شوية علفه فى الدور

اولا تلقى حفانان من الغله على الشط مبارة  

ومن بعد المرايا تلقى بحفان اخر على شكل خط يمتد الى متر ونصف للداخل

وكما شرح استاذنا ايمن الديدامونى فى السابق هذا الكلام

يترك الدور لمدة لا تقل عن نصف ساعة ثم تعود له ويجب الحرص كل الحرص ان تكون بعيدا عن راس الدور وعلى قد ما تقدر تختفى لان سمكة الغله حساسه جدا

يراعى فى اختيار المكان قبل القاء المرايا ان يكون  الدوراجوف او بيضاوى الشكل او ربع دائرى

اشهر الاسماك التى تاكل الغله الشبار البلطى اساسى – البلاشون – مبروكة – قرموط – اذا تواجدوا فى الدور

طريقة التطعيم

يطعم حبه واحدة على راس السلاح من مؤخرة حبة الغله

وبعض الناس يطعمون اكثر من حبه والبعض الاخر يطعم السن باكمله

فى كل الحالات صحيصة

طريقة الرد والضرب عند الغمز

بالنسبة لشغل الغمز فى الغله هما حالتين فقط سحبه او غمزة واحدة فقط يا اما ليك يا اما راحت

الرد والضرب يكون عمودى لاعلى حتى تشكم السن فى المكان الصحيح من فم السمكة

طريقة الغمز هى اول ما يغطس الغماز بمسافة 10 سم يجب ان تكون يقظ لهذه اللحظة كما قولت ويجب ان ترد عليه

اما فى السحبه فتاكد انها سمكة لا تعوض ووزنها قد يتعدى المقاس المعتاد ويرد عليها فورا وعموديا

الامكانيات المستخدمة

عود او اتنين على حسب خبرتك

غماز رفيع جدا + خيط ماكينة 30 + ترميل 25 + سن 0.1 او 1 او2 او 3

تقل الرصاص حمص

واذا كنت من اهل الخبرة  بدون تقل افضل... ويستحسن ويفضل ان تكون الملابس من الغوامق

مع تمنياتى لكم بصيد وفير

جروب صياد النيل 

 Falco General

الصيد بالجوافه

بسم الله الرحمن الرحيم

وبه نستعين

اخواتى واصدقائى واعضاء جروب صياد النيل ... تحية طيبة من عند الله لكم جميعا .... بعد التحية

شرح

اولا الصيد بالجوافه يحتاج الى الصبر وثانيا له طريقة تحضير كصيد الغله وغيرها

انشاءالله هانبتدى بطريقة تحضير العلفة وهى عبارة عن

اربع او خمس ارغفه من العيش البلدى نصف سوى

يترك لمدة ثلاث ايام او اربع ايام ليجف تماما ثم يفرك الى حبيبات صغيرة

ثم يمزج بعصير الجوافه سواء بالسكر او من غير السكر ويراعى الا يعجن ويظللوا حبيبات

تحضر هذه الطريقة قبل الطالعه بساعات

انت الان على الدور

اولا تذهب الى المكان الذى سيرسى فيه السن

يبدر حبيبات الخبز فى الربع الاول فى الترعة بمسافة متر ونص على الاقل ما بين الشط والميه

ثم تقطع الجوافه الى مستطيلات كما الاصبع

ويفضل ان تكون الجوافه قوية وناشفه

تدكك فى الخيط عبر السن ويراعى ان يترك مسافة 1 سم فى نهاية ومؤخرة مستطيل الجوافه

ثم ترجع الى الخلف او الى الامام على حسب الاتجاه المفضل لك من 25 متر الى 30 متر

ثم تحدف حدافك فى وسط الميه موازى للمكان المعلوف وبالتدريج سيرسى الخيط بالسن الى المكان المعلوف بواسطة تيار الميه والرزاق ربى وربك

انواع الاسماك التى تاكل الجوافه

بلاشون – مبروكة – بنى – بياض - قرموط

الامكانيات المستخدمة

ان لا يقل عن ثلاث اعواد

خيط الماكينة 40 – 45 - 50

ترميل على حسب خيط الماكينة يقل 5 درجات او اكثر

السن يفضل ان يكون 4 او 3 ملوى غليظ

تقل الرصاص لا يقل عن 150 جرام

اجراس مشبك معلقه

 ولكم تحياتى وتمنياتى لكم بالصيد الوفير

Falco General

قصة من زمن الصيد الجميل

بقلم أ/ ايمن الديدامونى 

                                                                                 

الزمان ........ موسم 2009المكان ..... ترعة السلام

 - سهل الطينة لم يكن هناك ما يعكر صفو رحلتنا فى ذلك اليوم ، فكل شىء على ما يرام والحمد لله ... السيارة جاهزة والطعم جاهز والصحبة ولا أحلى من كده .وصلنا إلى معدية القنطرة حوالى الساعة الثالثة بعد منتصف الليل وكان الطريق مزدحم جداً لذا تأخرنا ، ركبنا المعدية وعبرنا الى الجهة الشرقية من القنال ، وصلنا إلى كافيتيريا ومطعم الننوس ( حاجة كده بلدى بس بيعمل شوية عدس عجب ) ، تناولنا العدس أنا وأخى إيهاب وأشرف صديقى وكان العدس هو السبب الذى جعلنا نركب المعدية فى هذه المرة وبعد أن إنتهينا إنتظرنا صلاة الفجر وصلينا فى المسجد المجاور للكافيتريا ، ثم إنطلقنا الى ترعة الذهب ، وصلنا على المية حوالى الساعة 5.30 صباحاً وإتفقنا أن نجلس على أحد التفريعات الجميلة ونحن نسميها ( ترعة البط ) لأنها مجاورة لبعض منازل أهل القرية وكان البط دائماً يأتى وينزل الترعة فيخاف السمك ويهرب من الدور ، المهم جلسنا فترة الصباح نشتغل بالجمبرى البرغوت ، وتم شراء الجمبرى من صديق لنا كان يسافر العصر بورسعيد ويشترى كمية من الجمبرى ويبيعها للصيادين على الكافيتريا .بدأ السمك يأكل معانا على الجمبرى وكنا بنأخد سمك كفافى كويس وأحياناً أصغر وأحياناً كان ممكن تقع معاك غلطة ربع كيلو ، إستمر هذا الحال حتى الساعة العاشرة صباحاً والواحد فينا بيكون ربنا كرمة بحوال 2 أو 3 كيلو .عند العاشرة قلت للشباب أنا رايح على الترعة الكبير ( ترعة السلام الرئيسية ) ومش حأتحرك من هناك لغاية لما نروح بإذن الله ، فقالوا يلا بينا ، وصلنا على الدور المحترم الذى إخترتة من مرة سابقة وكان بجوار ميزانية فتح بتدخل المية لتفريعة عرضها حوالى 20 متر ، المهم فردت عودين للريم وطعمتهم وبسم الله ورميت فى المية على مسافة حوالى 20 متر من الشط وطول الوش بيكون متر على الاقل .طبعاً عايز أقولكم حاجة مهمة جداً ودى هى أهم حاجة فى موضوع النهاردة ، كان موجود على مسافة 20 متر من الشط وبإتجاه مدخل المياة للتفريعة الجانبية ، كان موجود حاجة زى السور أو أكوام من الحجارة موجودة فى هذه النقطة وكانت المية مغطية هذه الحجارة بحوالى 20 سنتيمتر ، ودة يمكن علشان تكون عائق لتهدئة سرعة المياة عند الدخول للتفريعة ( للأسف تم إزالتها من قبل المسطحات بعد ذلك ) فكانت المنطقة دى وكأنها الكافيتريا الخاصة بالبلطى من الأحجام الجامبو ، بس مشكلتها أنك لازم تكون عارف حترمى فين لأن لو رميت غلط الوش بيوعر وبيقطع فى الحجارة ، بعد حوالى ربع ساعة بدأت تضرب على الريم وبدأت أخد سمك ربع ونص كيلو حوالى 7 سمكات بلطى وكذلك أيهاب أخويا وأشرف صاحبى ، وبعد حوالى ساعة ونص لقيت السمك معوم فوق الحجارة دى وبيأكل فى ديل الفرس اللى حواليها ، طيب أعمل إيه علشان يدخل على الريمة ، غيرت الوش تماماً وركبت وش تانى قصير طوله 15 سنتيمتر وغيرت الرصاصة وركبت غماز غلة صغير جداً جداً رمش العين لا يكاد يكون له وزن وبدأت أرمى جنب الحجارة وبعدين أسحب لغاية لما يجى الوش على الحجارة والحمد لله مكنش فيه هواء أو رياح لذلك كنت أتمكن من رمى الخيط لمسافة كويسة وكان لازم أخفف من حجم الريم اللى بطعمة فى السن علشام لما الريمة بتأخد مية بتكون تقيلة وتغطس لتحت ، المهم جربت أول مرة ومفيش ثوانى لاقيت الخيط بيشد وبيأخد على تحت الحجارة ، ضربت عليه وماشاء الله حاجة تقيلة ومحترمة ، وبدأت الم الخيط بحذر حتى لا يشبك السن الحر فى الحجارة ، والحمد لله وصلت السمكة بسلام إلى الأيس بوكس وزن حوالى 2.5 كيلو .رميت المرة التانية بنفس الطريقة ومباشرة أخدت السن ونزلت لتحت الحجارة ولما رديت وضربت على الخيط كان السن الثانى الحر شابك فى الحجارة وهنا كان لازم الواحد يتصرف بحكمة ، فضلت ثابت بإيدى على الخيط والخيط مش مشدود قوى يعنى يكون مريح حاجة بسيطة علشان تعطى السمكة فرصة أنها تأكل الطعم فى السن اللى شبك فى الحجارة وتسلكة ، وقد كان وبعد حوالى نصف دقيقة لاقيت الخيط بيشد والسمك واخد الخيط على جوه المية مش تحت الحجارة بس كانت حاجة تقيلة فعلاً ، فى الحالة دى إيهاب وأشرف قالولى دى حتة كبير جداً وأنا قولت لهم لالالا دى سمكتين لأن السمكة التانية هى اللى بلعت الطعم وسلكت السن من الحجارة .ظل التعامل مع السمكتين لمدة 8 دقائق بالضبط بكل دقة وحرص وحرفته لغاية لما وصلوا على الجسر وكأنك بتشد قماشة من المية وبدون اى مقاومة قام إيهاب أخويا برفعهم على الملقاف مع بعض وكانت واحدة منهم وزنها حوالى 3 كيلو والتانية كانت حوالى 2.5 كيلو ................ وبعدها ،،، حلفت ألف يمين ما عادت تأكل مرة تانية ، وكان من أحلى الايام وأمتعها .

الدروس المستفادة* كيفية التأقلم مع الدور وتطويع معداتك لخدمة الدور
* عدم التسرع فى إخراج السمكة طالما هناك ما يهددها بالضياع
* لابد أن تتخيل طريقة معيشة السمكة وتحركاتها فى الدور

ودى صورة السمك فى اليوم ده
بلطى بالدم