صيانه مكنه الصيد

                                                                                      بسم الله الرحمن الرحيم


                                                                                                 

كيفيه التنظيف والصيانه الادوات المستخدمة ؛-

 1-فرشة اسنان تالفه                  2- ماء ساخن                          3-سائل تنظيف مثل الربسو           4- شحم نظيف اولا 

  

                                                                                 

 ثانيا  :- فك اجزاء المكنه بالكامل

 غسل اجزاء المكنة بالفرشة والماء الساخن واضافه الية سائل التنظيف حتا يذوب الشحم القديم المتراكم داخل المكنه دع الفرشة تتغلغل داخل اجزاء الماكينه بالكامل حتا يذيل الشحم القديم بالكامل

ثالثا :- تشطف الاجزاء جيدا بالماء لازالة ما تبقا من سائل التنظيف

رابعا :- تجفيف الاجزاء جيدا ويستحسن ببلور هواء خامسا :- تشحيم العمود والتروس ورمان البلى

خامسا والاهم :-

هو عند تفكيك الماكينه يكون بحظر لوجود سوست لان من الممكن عند الفك تطير ولا تعلم كيف كانت 

ملحوظه مكن الصيد لا يتشابه فى الحركه ووضع التروس 

فيجب عند الفك التذكر وضع الجزء
ويستحسن فى البدايه تصوير كل مرحله على حده لسهوله الرجوع لها والتذكر 

كتابه الحاج الاستاذ شيخ صيادينا : عراقى زغيبر
لجروب صياد النيل

صيد سمكه الدقماق

                                                                          بسم الله الرحمن الرحيم

    

                                                                             

احبائى الصيادين . بعد التحيه اسمحولى نتكلم النهارده فى السمكه رقم 2 فى النيل من حيث القوه والمتعه فى صيدها وهى الدقماق . واحب اقول ان كل ما سوف اطرحه قابل للتعديل وهو مجهود شخصى لاخوكم وعن تجربة الواقع .بعض الصيادين بيقولوا عليها دكر البياض وفى بعض المناطق دكر العبيدى .عمر السمكه دى بيكون حوالى من 8 الى 9 سنوات . واوزانها واحجامها بتوصل الى ماشاء الله .

                                                   

                              

و عن تجربتى افضل اوقات صيدها فى شهور 9 و 10 و 11 و 12 . وافضل الفترات الليل الى طلوع النهار . ولكن رزقى منها كان بعد الساعه 12 بالليل .

نيجى لطرق صيد الوحش ده ؛ اولا هو الاغلب طبعا بنشتغله حداف ولكن شوفت صيادين اصحابى بيشتغله عليه بالغماز ولكن بترفع الغماز على الاخر وطول الوش وعلى فايبر طويل طبعا لا يقل عن 5 متر او بتشتغل بالغماز الحر وتتحكم انت بطول الوش . لكن انا بفضل الحداف طبعا على عود جبر او صب. المكنه قويه وسريعه وكبيره لانه ممكن يسحب خيط منك وده حصل معايا والشعر الاساسى يفضل 60 والرمال لاتقل عن 35 وانا بستعمل غالبا 40 . والطعم بيكون اما طعم بلدى يعنى الدود الارضى العادى وبتعنكب 2 او 3 براحتك فى سن لايقل عن 6 . او بالطعم الحى زى انومه او كركور صغير بتقص شوكه وبتشكه بسن 01 او 02 او 03 . وطريقة شك الطعم الحى بيكون بسن واحد جنب الشوكه الظهريه . او سنين واحد من فوق اخر الراس وواحد من عند زعنة الذيل . او 3 سنون وطبعا دى الافضل واحد عند الراس وواحد عند الزعنفه الظهريه وواحد عند الزعنفه الذيليه . اللى عند الراس اتجاهه للذيل واللى من النص والديل اتجاه السن للراس . والرصاصه تقيله لانك حترمى فى ميه حاميه وطبعا مع الطعم الحى حتستخدم رصاصه اتقل . وانا بستخدم رصاصه 125 جرام مع الطعم الحى . طبعا لو حتشتغل بطعن حى يبقى لازم من العصريه تكون على الميه وتختار سمكه عفيه وطبعا يفضل الانوم او المزه . واول ما تضرب معاك السمكه اضرب عليها بس من غير غشوميه ولم بهداوه ولو عافرت جامد وصدقنى ده اللى حيحصل  اديلها خيط ومتع نفسك واتفرج على تقويس العود حيكون ازاى والضرب على لبلوبك ازاى ولما تتعب و تشرق لم جامد وربنا يرزقنا ويرزقكم متعة صيدها . اسف على الطاله وارجوا المشاركه لانى عارف انى فى صيادين اكتر خبره منى فى الجروب فى صيد الدقماق . اخوكم مصطفى .نيجى لطرق صيد الوحش ده ؛ اولا هو الاغلب طبعا بنشتغله حداف ولكن شوفت صيادين اصحابى بيشتغله عليه بالغماز ولكن بترفع الغماز على الاخر وطول الوش وعلى فايبر طويل طبعا لا يقل عن 5 متر او بتشتغل بالغماز الحر وتتحكم انت بطول الوش . لكن انا بفضل الحداف طبعا على عود جبر او صب. المكنه قويه وسريعه وكبيره لانه ممكن يسحب خيط منك وده حصل معايا والشعر الاساسى يفضل 60 والرمال لاتقل عن 35 وانا بستعمل غالبا 40 . والطعم بيكون اما طعم بلدى يعنى الدود الارضى العادى وبتعنكب 2 او 3 براحتك فى سن لايقل عن 6 . او بالطعم الحى زى انومه او كركور صغير بتقص شوكه وبتشكه بسن 01 او 02 او 03 . وطريقة شك الطعم الحى بيكون بسن واحد جنب الشوكه الظهريه . او سنين واحد من فوق اخر الراس وواحد من عند زعنة الذيل . او 3 سنون وطبعا دى الافضل واحد عند الراس وواحد عند الزعنفه الظهريه وواحد عند الزعنفه الذيليه . اللى عند الراس اتجاهه للذيل واللى من النص والديل اتجاه السن للراس . والرصاصه تقيله لانك حترمى فى ميه حاميه وطبعا مع الطعم الحى حتستخدم رصاصه اتقل . وانا بستخدم رصاصه 125 جرام مع الطعم الحى . طبعا لو حتشتغل بطعن حى يبقى لازم من العصريه تكون على الميه وتختار سمكه عفيه وطبعا يفضل الانوم او المزه . واول ما تضرب معاك السمكه اضرب عليها بس من غير غشوميه ولم بهداوه ولو عافرت جامد وصدقنى ده اللى حيحصل  اديلها خيط ومتع نفسك واتفرج على تقويس العود حيكون ازاى والضرب على لبلوبك ازاى ولما تتعب و تشرق لم جامد وربنا يرزقنا ويرزقكم متعة صيدها . اسف على الطاله وارجوا المشاركه لانى عارف انى فى صيادين اكتر خبره منى فى الجروب فى صيد الدقماق . اخوكم مصطفى .

كتابه استاذ /  MOSTAFA ESSAM 

https://www.facebook.com/groups/SYADELNEEL/

صيد سمك التايجر فيش (كلاب السمك)

                                                           بسم الله الرحمن الرحيم 

كلاب البحر  ( الملوحة ) التيجر فش
من الاسماك المميزة والشيقة من حيث السرعة وطريقة الصيد يوجد بوفرة فى الاماكن التى بها تيار والارض رمله 0
الاحجام تصل حتى 5 أو 6 كم ولاكن به شده اكبر بكتير من وزنه









                                                                       

                                 




وقت الصيد : من الظهر حتى غروب الشمس  

طريقة الصيد :
عن طريق الطعم الحى البلطى الصغير على وتر 60 أو 70 دى العادى اما الكبير بيكون على وتر 90 أو 100 مع وضع رصاص كبير وهو من الاسماك التى تحب السرعة لذلك يتم صيده بالحداف على ان تسرع فى لم الخيط السرعة تجعله يأكل الطعم وممكن عن طريق الترقيد على الارض لاكن بيكون أكله ضعيف عن السحب السريع 

ومن الطرق المبتكرة لصيده :-
نقوم باصتياد الكلب بالبلطى ثم نأخذ عين الكلب بحرص حتى تخرج سليمة ونضعها فى السنارة ونصتاد بها بتكون رائعة فى صيد الكلاب لانها بتكون صغيره بحيث يأخذها كلها مع السنارة 0 بالنسبة للسنارة يفضل ان تكون لونها اصفر ملوية حتى لا يراها ومربوطة فى وير أو مدور بكلابس حتى لايصل الى الوتر ويقطعه وايضا يتم اصتياده بالجر بالرابلات ( الشادراب ) 

طريقة عمله ملوحة :
يتم فتح الكلاب بالسكينة من فتحة الاخراج حوالى 3 سم ويتم اخراج البلونه الموجودة بداخل الكلاب ثم نقوم بوضع الملح فى الفتحة وفى الخياشم ثم نضع الكلاب فى جردل بلاستيك محكم الغلق وبعد يوم يتم فتح الجردل وسكب الماء الذى يخرج من الكلاب ثم نغلق مرة اخرى ونكرر هذه العملية لمدة ثلاث أيام وذلك لخروج الماء الزفر من الكلاب ثم نحضر جردل به كيس بلاستيك ثم نرش فيه ملح ونرص الكلاب فيه ثم نرش ملح ونرص كلاب ثم الملح وهكذا حتى ننتهى ونضع معه شطة حتى لا تدود ونقوم بغلق الكيس جيدا ثم نغلق الجردل باحكام وبعد اسبوع يتم قلب الكلاب التى فى الجردل ونرصه من جديد بحيث تكون الكلاب التى فوق ترص فى السفل ثم نتركها حتى تستوى وبالهناء والشفاء

كتابه استاذ عبد الله فرغلى لجروب صياد النيل 
https://www.facebook.com/groups/SYADELNEEL/

الصيد بالريم

صباح الخيرات والسعادة على كل صيادين النيل

النهاردة حنطرح موضوع مهم للنقاش وأرجو من الجميع

التفضل بالمشاركة حتى تعم الفائدة على كافة الأعضاء

الجدد والقدامى ...

موضوعنا هو الصيد بالريم

أولاً : أنواع الريم والفرق بينها وطريقة حفظها وتطعيمها فى السنار

ثانياً : موسم الصيد بالريم ( مواعيده وأماكنة ) والمياة التى يتم الصيد فيها

ثالثاً : أنواع الأسماك التى تتغذى على الريم .

رابعاً : العدة المستخدمة والمناسبة للريم ( العود - المكنة - الخيط - مقاس السنار ونوعه )

خامساً : كيفية تزفير الدور بالريم .

نتمنى المشاركة من الجميع بالتجارب والخبرات

وتنوية ..... المثل بيقول كل شيخ وله طريقة

الصيد ملوش قوانين ثابته أو قواعد وكل يوم يتم إكتشاف

طرق جديدة ... وكل شيىء بالتجربة .

أولاً : الريم هو نوع من الطحالب الخضراء التى تنمو فى مياه النيل والترع وكذلك البرك والمستنقعات ، وتتغذى عليه الأسماك ، يسمى فى بعض المناطق ( الريم - الريمة ) وفى مناطق أخرى يطلق عليه إسم ( الخضار ) ، وهناك نوعين أساسيين من الريم يستخدمون فى الصيد ، النوع الأول : الريمة التى تنمو فى المياه الضحلة أو الراكدة وتكون أرضية هذه المياه طينية ( طمى ) وتنتشر هذه المياه فى الوجه البحرى من مصر وتكون الريمة فيها لونها أخضر غامق وتكون الريمة قصيرة أو يطلق عليها ( فتلة قصيرة ) وملمسها خشن إلى حد كبير وفى العادة تكون متشابكة وتحتاج الى التنظيف مما يتعلق بها من روايب واشياء وأغصان النباتات الاخرى المتشابكة معها ، وعادة عندما ندقق النظر فى هذا النوع من الريم ، قد نجد ديدان حمراء دقيقة جداً بين حبال الريم .... لذلك يطلق عليها بين الصيادين ( الريمة الزفرة ) وأنا عن نفسى لا أفضل هذا النوع لأن هناك بعض اسماك البلطى عندما تقترب منها لتبتلعها فتجدها خشنة ولا تذوب فى فم السمكة بسهولة فلذلك تهرب منها لان المفروض أن الريم يكون ناعم ومتماسك لاننا وكما نعلم ان البلطى مثلاً يدخل على الريم ويتغذى عليه عن طريق الشفط من طرف الريم فيجب ان تكون ناعمة ومتماسكة الى حد ما حتى لا يهرب السمك منها .......................... تكمله

ثانيا : أما بالنسبة للنوع الأخر من الريم ويطلق عليه بين الصيادين ( الريم الاسوانى ) و1لك نسبة الى اماكن نموه وتواجده بنيل وبحيرات أسوان جنوب مصر ... حيث ان الريم الاسوانى مختلف تماماً عن النوع الاول الذى ذكرناه ... الريم الاسوانى يتميز بنعومه ملمسة ولونة الأخضر الزرعى الفاتح وخيوطة الطويلة الناعمة ... لدرجة أنه فى بعض الأحيان تجد ان لون الريمة وكأنه أصفر او مقارب الى الصفار ... وترجع مواصفات هذا النوع من الريم الى طبيعة المياة والمنطقة التى ينمو فيها .... حيث أن المياه جارية وسريعة والارض معظمها رملية فلا توجد شوائب او عوائق فى هذه المياه .... لذلك ممكن ان يصل حبل الريم لطول 20 أو 30 متر ......... لدرجة أنه فى سنه من السنوات توفى أحد الاشخاص غرقاً بعد أن لف حبل الريم عليه وجرفة تيار الماء .... وعادة يبدأ الريم الاسوانى فى الظهور مع إرتفاع درجة الحرارة حيث أن الريم المتواجد فى مياه الترع فى وجه بحرى يبدأ هذا الريم بالإختفاء من تأثير درجة الحرارة والشمس ............. وبذلك نجد أن الريم الاسوانى هو الافضل من وجه نظرى فى الصيد لمميزاته الاتيه ( نظيف - ناعم - لونه فاتح يجذب السمك اليه - ذو شعر طويل يغرى السمك عند نزوله فى تيار الماء ) ولكن من أهم عيوبه أنه لا يصمد طويلاً ويتأثر بالحرارة بصورة أكثر من النوع الاخر ............. وبذلك نكون قد وضحنا للسادة الاعضاء المحترمين نوعى الريم المستخدمين فى الصيد ، بقى أن أقول لكم أننى كنت اتعامل مع تجار للريم فى شبرا المظلات ( أولاد سعد ) ومكانهم فى مقابل موقف سيارات شبرا المظلات على الجانب الاخر من فرع ترعة الاسماعيلية 

ثالثا : طريقة حفظ الريم ... ورق جرايد طبعاً ويتم رشها بالبخاخ جيداً أو لو عندك كمية يبقى تسقط كمية من ورق الجرايد يكون متقطع نص صفحة فى حوض ماء وبعدين لما تخرجه لازم تسيب الورق يصفى الميه اللى فيه ... فلو مثلا حتطلع تصطاد ومعاك 15 ورقة ... لف كل خمس ورقات فى ورقة جرايد مرشوشة بالبخاخ وبعدها قماشة او فوطة تبلها ميه وبعدين تعصرها وتلفها على الريم ... ولازم يكون محفوظ فى مكان بعيد عن الشمس ... انا مثلاً اضع الريم بعد لما الفه بالقماشة فى كيس بلاستيك واربطه كويس وأضعه معلق فى الايس بوكس بس بعيد عن الميه والثلج واطلع ورقة ورقة استخدمها ... اما بالنسبة لطريقة التطعيم فهذه تتوقف على طبيعة الميه والسمك اللى بياكل معاك .... مثلاً فى ترعة الاسماعيلية تكون الريمة عبارة عن شعر ريم طولة حوالى 10 سم أو اقل وغير سميكة بحيث تضع السنار من ناحية المعلقة او الخيط يعنى على منتصف شعر الريم وتبدأ تلف احد الاطراف على السنار لغاية نهاية سلاح السنار ثم تلف الطرف الاخر من شعر الريم عكس الاتجاه حتى يتلاقى الطرفان على سلاح السنار ويجب ان يكون شعر الريمة خارج عن السنار مثلا 5 سنتى ليتدلى فى الماء ويتحرك مع تيار الماء فيغرى السمك ويهم عليه مباشرة ... وهذا لما يكون السمك مش خشن أو أحجام عادية .... لكن لما يكون الدور مجمع سمك وحاضر يبقى لازم تخفف الريمة علشان السمك مينتش الريمة .... أما بالنسبة مثلاً للصيد بالريم فى ترعة السلام ( الترعة الاساسية ) سبق ووضحت لحضراتكم أن فيها احجام كبيرة من مختلف الانواع .... وكلامى تحديداً على البلطى .... هناك ورقة الريم بأقسمها بالضبط 5 تطعيمات .... لأن السنار بيكون كبير مقاس 4 أو 5 أو 6 مثلاً ولما بتكون الريمة كبيرة بتعمل هوس للبلطى وبيدخل عليها بدون تردد او تفاهم ..................................... 

رابعا : بالنسبة لموسم الصيد بالريم فهو يبدأ من شهر 3 ويستمر حتى منتصف شهر 10 ويكون فى قمته فى شهور 6و7و8 .... وبالنسبة لأوقات الصيد بالريم وانا أتكلم عن البلطى خصوصاً نظراً لأنه السمك الاكثر انتشاراً ، فيبدأ البلطى بالدخول على الريم مع بدايه ارتفاع حرارة الماء اى بعد الساعة الحادية عشر صباحاً ويستمر حتى غروب الشمس لان السمك يبدأ بالاكل قبل البيات ليلاً ........ كمبدأ عام فإن السمك يبدأ بالدخول على الريم مع ارتفاع الحرارة ويكون نهاراً حيث ان الريم لا يمكن استخدامة فى الصيد ليلاً لأنه يعتمد فى الصيد على الحركة والرؤية وليس الرائحة كصيد الليل ... نأتى بعد ذلك الى الادوار التى يتم الصيد فيها بالريم ... فالقاعدة العامة ان الريم يحتاج الى ماء جارى بنسبة متوسطة حتى لا تقطع منك الريم وتسمى هذه الطريقة بطريقة التسريح ، حيث أنه يتم اختيار دور الماء فيه جارى فلو فرضنا مثلاً انك جالس امام الماء وسريان الماء يتجه من اليمين الى اليسار ... إذا تبدأ فى رمى الخيط على ناحية اليمين مثلاً لتبدأ الدور من أوله وحتى تتمكن من التسريح فى أكبر مساحة ممكنة وطبيعى الخيط بتاعك حيمشى مع التيار من اليمين الى اليسار وعند نقطة الإطعام وهى النقطة التى يبدأعندها السمك فى الأكل غالباً ما تكون نقطة تجمع الاسماك ... يبقى تحاول بكل الطرق انك تمنع الخيط ان يتعدى تلك النقطة حتى لا تخرب الدور وتشتت السمك ويهرب من الدور ... وعند البلع ترد العود بتاعك فى الاتجاة العكسى ولكن بفن وإحتراف حتى لا تقطع السمك منك وحتى لا تخيف باقى السمك فى الدور ولا يهرب منك ....

خامسا :  إسمحوا لى أن أتكلم عن جزء هام جداً فى الصيد بالريم .... وهو العدة المستخدمة .... بالنسبة للقاعدة العامة أن صيد الريم محتاج عود طويل نوعاً ما بمعنى ألا يقل طولة عن 3 أمتار .... واحنا هنا بنتكلم على الشىء المثالى بمعنى انه ممكن تصطاد بعود 210 سم مثلاً ... يعنى العملية نتيجة اكثر من تجربة ونحن نختار الانسب ... ومن شروط عود الريم أنه لا يكون (جبر ) واللبلوب بتاعة يكون ( رقع ) علشان يأخد ويدى مع السمك والسمك ميهربش منك .... أنا عن نفسى بصطاد بعود 550 سم وبالنسبة لموضوع الانواع فهى كثيرة ومتعددة المهم المواصفات ... وبالنسبة للخيط ... العادة يكون خيط الضهر اللى على المكنة مقاس 30 مم أو 25 مم وخيط الوش بيكون 18 مم أو 20 مم أو 22 مم وذلك كما تفضل إخوانا الاعزاء ووضحوا ذلك بالتفصيل ويستعمل عادة السنار العسلى مقاس 9أو10أو11أو12 ... حسب أحجام السمك فى منطقة الصيد لأن العدة اللى ذكرناها الأن تنفع لصيد بلطى لغاية 2 كيلو مثلاً مع الحرفنة انه ميقطعش لو خيطك 18 مم

سادسا : أما بخصوص بعد التجهيزات الخاصة بالمناطق اللى فيها أحجام سمك كبير بياكل الريم فدى أنا عن نفسى بأستعمل خيط 40 على الأقل على المكنة وخيط 30 أو 35 مم فى الترميل لأن ممكن يطلع معاك بلطى من 5 كجم لغاية 9 أو 10 كجم ، فلازم تكون مستعد علشان متحرقش دمك لو قطع منك لأنى كتير حاولت أعمل فيها محترف ذيادة عن اللزوم وقطع منى سمك كبير جداً .... المهم نيجى لطريقة ترميل السنار وضبط الوش .... أساسى أن يكون الغماز بتاعك مخروطى ( طاروخ )(ما يعرف ايضا باسم الغماز الاراجوز) سواء حتصطاد فى المياة الماشية ( التسريح ) أو حتصطاد ترقيد فى ميه واقفه و  بتركب قشرة رصاص وتوزن الغماز بحيث يكون ربع الغماز أو اقل هو الظاهر على وش الميه ... والغماز يكون بايت على الرصاصة والرصاصة على المدور مباشرة ... أما طول الوش فبيكون فى المياة السريعة العميقة حوالى متر ونصف والمسافة بين السنين لا تقل عن 20 سم ... وطبعاً بالنسبة للمكنة مطلوب المكنة الخفيفة السريعة علشان انت بتبذل مجهود عالى فى صيد الريم فلو المكنة بطيئة او ثقيلة حتستنفذ قواك بسرعة وحتتعب ................. وأرجو أنى أكون أفدتكم بخصوص هذا الموضوع .

أخوكم

أيمن الديدامونى - المحامى

https://www.facebook.com/groups/SYADELNEEL/permalink/758866754123798/

صيد قشر البياض من ترعه السلام

أسعد الله مسائكم جميعاًوجعل الله جميع أيامكم صيد وأفراحويرزق الجميع من فضله

حبيت أنى أقولكم عن تجربتى الشخصية فى صيد سمكة رائعة
يبحث عنها جميع الصيادين ويتفاخرون بصيدها وأحمد الله أننى كنت
واحداً ممن كتب لهم الله إصطيادها مرات عديدة
بس بصراحة الكلام ده منذ حوالى 3 سنوات ولم أكن وقتها أهتم بتصوير
السمك ....
وإليكم تجربتى الشخصية منذ بداية رحلة الصيد حتى العودة ، وأحب أن أنوة أنه ليس شرطاً أن تكون طريقتى هى المُثلى أو الصحيحة ولكن المهم فى النتائج .

أولاً : أنا من سكان مدينة أبوكبير محافظة الشرقية ومكان الصيد هو ترعة السلام التابعة للقنطرة شرق - سهل الطينة ، محطة الرفع 4 أو كوبرى 10 ... التحرك بسيارتى من أبوكبير بعد صلاة العصر مباشرة وبصحبتى أخى الأصغر وإثنين من أعز أصدقائى وهؤلاء هم رفقائى دائماً ونادراً ما أخرج للصيد بدونهم .

ثانياً : متطلبات الرحلة : طعام يكفى ليوم وليلة ومياة تكفى للشرب لبعد مصدر مياة الشرب عن المنطقة وأيس بوكس كبير حوالى 50 ليتر لحفظ الثلج به ، أيس بوكس لإستخدامك الشخصى فى الصيد ، عدد كافى ومتنوع من الأعواد والمكائن والسنار والخيوط والرصاص وجرس للعود وفسفور لو تحب ، طعم متنوع سأشرحة فيما بعد .

ثالثاً : نصل إلى المياة قبيل المغرب عند محطة الرفع 4 ، أبدأ بفرد عود 360 سم رقع لصيد البلطى الشِر من التفاريع العديدة التى هناك ، وبحضر عياشة وأضع فيها الشِر اللى يكون صحتة كويسة لأن القشر مبيدخل غير على السمكة الحية ، خلال ساعة تقريباً أكون إصطدت حوالى 10 أو 12 سمكة بلطى شر ، بعدها أصلى المغرب وأبدأ فى الدخول لصيد القشر .

رابعاً : أحضر عود القشر وهو عبارة عن عود (شكسبير _ دايوا ) 240 سم صب قطعتين وعلية ماكينة شيمانوا أو بانكس 7000 ، المهم لازم تكون مكينة قوية والخيط على المكنة مقاس 70 أو 80 مم وأنا بستعمل Big Game أحمر .... وخيط الترميل عبارة عن خيط حرير prow power مقاس 20 ليبرة يعنى يشيل لغاية 35 كيلو تقريباً ، والسنار بيكون مقاس 2 أو 3 عسلى محمل ، وبتربط الوش الحرير مع خيط المكنة وبينهم مدور كبير بدون قفل ، وأنا عن نفسى بركب الرصاصة تحت الوش بحوالى 25 سم وبدون غماز .... وبركب جرس على لبلوب العود ... وأخد سمكة من العياشة تكون صحتها حلوة وأشبكها فى السن من خلف الرأس من ناحية الزعنفة الظهرية بدون أن تلمس العصب ( الشوك ) .   

خامساً : أنا بقف فى منتصف الكوبرى وأقول بسم الله الرزاق وترمى فى المية ، وأركن العود على الكوبرى وأشغل العود الثانى عبارة عن فيبر 3 متر ، الأمين ... وعليه ماكينة ميتشل 5000 والخيط عليها 60 مم والوش 45 مم وغماز وسط مع رصاصة للوزن والسن بيكون 3 أو 4 والطعم عبارة عن دود بلدى ( علق ) واحد صاحبى بيجيبهولى من الجنينة بتاعتهم من تحت طلمبة المية ، طعم أسود تخين بس محترم وبطعم السن عنكبوت حوالى 3 طعمات وأرمى ناحية الشط شوية .

سادساً : أهم حاجة تكون عصفورة المكنة مفتوحة لأن القشر مجرم وحساس جداً ولو شعر بالخيط حيهرب ، وبعدين لما بترمى الخيط بتحدد طول الوش والقشر لما بيشوف السمكة بتجرى بيهجم عليا زى المجنون وأهم حاجة لما تلاقى الجرس بيرن على اللبلوب تصبر ثوانى لغاية لما القشر يبلغ وبعدها يا معلم تقفل عصفورة المكنة وتكون ظابط الدراج بتاع المكنة على 18 أو 20 وتضرب على السمكة بحرفنة يعنى ترد الخيط بحيث السن يرشق صح ، وتبدأ تلعب مع السمك وتشرق فيه لغاية لما يتعب ولو حسيت أنه بيشد معاك إفتح الدراج بتاع المكنة شوية وأهم حاجة يفضل الخيط بينك وبين السمكة مشدود وميكونش فيه بوش .

سابعاً : ربنا يكرمك وتيجى القشرة أو ( حمار البحر ) زى ما بيسموه فى المنطقة ، يجى على الشط وحسب الوزن ، لو كان وزنة كبير مثلاً فوق 2 كيلو يبقى لازم يساعدك حد بالملقاف ويرفعة من المية ، أما لو كان وزنة أقل فممكن تشيل على الخيط ..... وأهم نصيحة فى هذا الجزء أنك متستعجلش ومتخفش لأنه لو بلع معاك صح وعدتك كويسة .... يبقى السمك بتاعك إن شاء الله .

ثامناً : الأوقات التى يدخل فيها القشر ، بعد صلاة المغرب مباشرة أى بعد غروب الشمس ودخول الظلام ، وعند منتصف الليل وحتى شروق الشمس ، وفى أحيان بيدخل فى النهار وقت الظهيرة ، ولازم تأخد بالك لأن المية بتاعت ترعة السلام فيها أحجام كبيرة ممكن توصل لغاية 30 كيلو وأكثر .......... أنا عن نفسى أكبر حاجة طلعتها من هناك 12 كيلو .

تاسعاً : ممكن يدخل على الدود ( العلق ) بلطى تقيل أو قرموط أو بنى أو مبروكة ، ومع شروق الشمس ممكن تريح ساعة نوم فى العربية علشان تقدر تواصل ومع شروق الشمس أبدأ أنزل بالريم على البلطى فى التفاريع وحتى وقت الظهر .... أرجع على ترعة السلام الرئيسية وأنزل عود بالطعم حداف والتانى ريم .

عاشراً : بعد العصر ......... نستعد للرحيل والعودة إلى الديار محملين بالغنيمة وفى منتهى التعب ونقول لبعضنا الواحد لازم يريح الأسبوع القادم ونيجى نصطاد الأسبوع اللى بعدة ............ ويمر يوم أو يومين وتبدأ التليفونات تشتغل لتحديد أقرب موعد للرحلة التالية .......... الصيد فى ترعة السلام حكاية عشق لا تنتهى .

يارب أكون قد أوفيت فى الشرح وزى ما قولت دى تجربة شخصية بحتة ، وممكن يكون فيها حاجات كتير غلط ولكن المهم النتائج ........... وتصبحوا على ألف خير .

أخوكم
أيمن الديدامونى - المحامى

https://www.facebook.com/groups/SYADELNEEL/